Thursday, September 18, 2008

انا جيت منين

ـ

أعشق النوم انا .. لكنى لم اعد استمتع به .. ها هى ضحى تعبث فى أذنى من جديد يبدو اننى مجبر لا محاله على أن أرد عليها والا ستظل تعبث بوجهى حتى ينتهى كل امل بالعوده لاستكمال الحلم
ضحى : بابا بابا بابا با......ـ
انا : نعم نعم نعم مش قلتلك ميت مرة تندهى عليا مرة واحده
ضحى : انا جيت منين يا بابا
انا : من الصاله يا ضحى وسيبينى بقى عشان عايز انام
ضحى : لأ انا اقصد جيت منين اصلا
انا : ما قولتلك من الصاله او الريسيبشن
ضحى : يا بابا انا عايزة اعرف جيت الدنيا منين
اعتقد انها بدأت تعبث بأفكارى لن استطيع التفلسف معها حاليا مازالت تراودنى امنيات العوده الى الحلم السابق ولا استطيع ايضا ان اعبث بمخيلتها ولا تجوز الاجابه بأى شئ و...ـ
ضحى : ها يا بابا انا جيت منين ؟
ممكن يا ضحى تستنى لما اصحى ونبقى نتكلم
طب ما انت صاحى
لأ انا نايم يا حبيبتى
امال بتكلمنى ازاى
دانت فايقه بقى ومش هتسيبينى فى حالى
اقوم معها وانا نصف مستيقظ اخرج بها الى الصاله حيث تجلس زوجتى ... العصابه كلها مجتمعه ، الواد حمزة ويحى وايثار .، لم اكن ادرى اننى سأواجه العصابه كلها وحدى الان وانا نصف مستيقظ ... الان على ان احدد وبسرعه اما الانسحاب والتسليم او المواجهه
الواد حمزة يستفزنى بنظراته اللئيمه وابتسامته الساخره ، يبدو انه من ارسل اخته بهذا السؤال اللعين
انا احدث نفسى - والله العظيم يا حمزة لوريك يانا يانت فى البيت دا - ابتسم فى وجه حمزة ابتسامه بلهاء وكانى لم ادرك مخططه واقول له عملت ايه فى امتحان القرءان يا حمزة وسرعان ما المح على وجهه علامات الارتباك - لا يعلم اننى تحدثت مع الشيخ طارق ... واحده بواحده يا حيوان يا نا يانت فى البيت دا - الان اصبح من حقى ان ارد له نفس الابتسامه الساخرة والنظرة اللئيمه ، لكننى لن ازايد عليه اكثر من ذلك ولن انتظر الرد منه .. انظر اليهم اتأملهم ... زوجتى تشاهد الجزيرة .. حمزة تراجع عن المقاومه يبدو انه ادرك انه يعبث مع خصم قوى .. يحى لا يفعل شئ وضحى تنتظر منى اجابه وايثار تمسك الكراسه الاسكتش والفرشاة وانا نصف نائم ... الان يجب ان اتحدث واقول اى شئ
ايثار تيجى تنامى جنبى
ضحى تكرر السؤال امام الجميع : انا جيت منين يا بابا
زوجتى تندهش من السؤال وحمزة يبتسم من جديد
انت جيتى من بطن ماما يا ضحى
طب وليه مجتش من بطنك انت
عشان ربنا خلق الست هى اللى تقدر تخلف يا ضحى وهى تقدر تشيل بيبى فى بطنها
طب هو ربنا فين
اعى تماما ان هذا السؤال ليس علاقه لحمزة به ... كما اعى ان الحديث عن الاعجاز العلمى وعن فكرة ان العدم لا يوجد حياة وان الطبيعه الصماء لا يمكن تفسيرها على انها خالق وان الحدث لابد له من محدث وعن دلائل وجود خالق مبدع كل ذلك لن تدركه مهما حاولت التبسيط وكيف لى ان اقول لها ان الرحمن على العرش استوى وان الله محيط بلا كيفية معلومه وان الاستواء معلوم والكيفيه مجهوله والسؤال عنها بدعه .. بدعه ؟ !! وهل تدرك هى معنى الاستواء حتى احدثها عن البدعه و.... ـ
ربنا هو اللى خلقنا يا ضحى وهو اللى خلق الدنيا دى كلها واحنا ان شاء الله هنشوفه لما ندخل الجنه
يعنى ربنا هو اللى خلقنى وانا فى بطن ماما
ايوه
يعنى هو دخل بطن ماما وخلقنى جوه
التذمر لن يجدى فى مثل هذا الموقف والهروب سوف يترك مخيلتها يتلاعب بها الشيطان .. يجب الان ان استدعى كل الهدوء الذى اكتسبته من حديثى مع اصدقائى الملحدين
الان الجميع ينظر لى بشده حتى ايثار تركت الاسكتش وتنتظر منى اجابات .. حمزة يبدو عليه الانتباه الشديد .. الامر كله اتخذ منحنى مختلف لم اكن ادرك اننى سأقع فى ذلك الشرك .. حتى زوجتى تنظر لى وتنتظر منى اجابه وكأنها تشاهد فيلم احداثه تتسارع فى تشويق .. انظر لها نظرة طويله لعلها تفهم ما اريد ان اقول " اتصرفى بقى هى بنتى لوحدى ولا بنتك انت كمان شوفى بقى هتقوليلها جت منين" ارى انها فهمت الرساله جيدا انها تستعد للكلام
الجميع ينظر لى وانا بدات اتنهد عندما ادركت ان امها ستبدأ الجوله معهم بدلا منى ... امنيات استكمال الحلم عادت تروادنى زوجتى بدأت تتحدث : طيب يا ولاد انا عارفه انكم جعانين هقوم انشر الغسيل واحضر الغدا وبابا قاعد معاكم اهو
تقوم ولا تحاول ان تنظر لى ... تكتم ابتسامه من ورائها ضحك عميق انا اعلم انها سوف تنفجر من الضحك عندما تبتعد عنا .. لقد اتقنت الهروب من الموقف .. اراها تقوم وانا انظر اليها بدهشه بلهاء لا اكاد استوعب كل ما حدث .. اتذكر الجمله المشهورة فى فيلم صلاح الدين "كل اصدقاءك خانوك يا ريتشارد واليوم ارثر"
انت عارفه يا ضحى انت وحمزة ويحى وايثار ... فى حاجات كتير فى حياتنا مش بنفهما بسرعه لازم ناخد وقت عشان نعرف نفهمها لأن مش كل حاجه بنقدر نفهمها واحنا صغيرين حتى بيبقى صعب على الكبير انه يشرحها لحد صغير .. بس اوعدكم فى الوقت المناسب نكمل كلامنا .. اتفقنا ؟
الان على ان اراجع كل الكتب التى قراتها عن نفسية الطفل وتربيته فكريا ... سوف اعاود فتح ملفات تم اغلاقها المرة القادمه انا الذى سيأخذ زمام المبادرة وفتح الموضوعات الشائكه ... ثلاثة ايام ويجب ان اكون انتيهت من ايجاد ردود تناسب عقولهم لكل تلك الاستفسارات وبعدها سأتفرغ لحمزة وزوجتى .. يبدو ان العصابه زادت واحد
-
-

4 comments:

واصطنعتك لنفسي said...
This comment has been removed by the author.
قلب شاعره said...

ههههه بجد سعدنى كلامك جدااا
حوار شيق وممتع جدا وجميله العلاقه الى بينك وبين بنتك حاول تحافظ عليها
جميل جداا انك بتحاول تربى باسلوب علمى تربوى ... مش سهله اسئلة الاطفال وبعدين اسئلتهم بصراحه منطقيه جدااا ..يعنى فعلا سؤال محير اوى انا جيت منين ؟؟؟ بالنسبه للطفل

همسات دافئه said...

الزوجه ده جدعه جدااا
ههههه
عشان تبقوا تقروا كتب وتخدوا كورسات وتصدقوا ان تربيه الأطفال ده مش سهله خالص
لازم تلاقى ردود تشبع فضولهم ومتخدعهمش كمان صعب انا عارفه:)
عارف مره كنت بتفرج على كرتون ولاقتهم مفهمين الأطفال ان المطر ده بيكون دموع السما وهى بتعيط
ما الأطفال مش هيفهموا الشحنات والسحب فهربوا كده
بكره لما يعروفوا الحقيقه هيكرهوكم
تحياتى ليك:)

سلوى said...

ربنا يخليهم لحضرتك :)

فعلا التربيه محتاجه جهد وقراءه

بس موقف الزوجه جامد جدا :))